今日 小編完成了一位親人既喪禮

小編認為 喺籌備一個喪禮嘅過程中

其實九成嘅工作都係由我哋統籌去做

而家屬真正要involve到其中嘅一個環節

就係揀相做大相

​

而揀一張相做大相 其實絕對唔容易

當然過身嘅通常係老人家

但係大家都知 其實老人家未必成日有機會影相

以前好多鄰舍中心 都會幫長者影吓「證件相」

但係呢一兩年小編又見少咗呢D「證件相」

所以其實家人要揀到一張相出嚟

真係唔容易

尤其是有一啲老人家 係長期病患

可能係過身前 已經長期住老人院

或者長期都係着住件睡衣

就算家人喺老人院影嘅合照 都未必適合做張大相

​

而小編亦都有試過唔少次

過身嘅係八 九十歲嘅婆婆

但係家人就拎咗婆婆喺二三十歲

喺影樓着住件旗袍影嘅相

不過小編相信呢個應該係老人家本身嘅意願

​

今次親人揀相既過程 小編都參與其中

通常到呢個時候 就會由最近既相再搵到幾十年前嘅相

睇吓究竟邊張相用得

同時家人又一齊回憶吓以前嘅生活趣事

搵搵吓 仲搵到小編N年前結婚嘅相原來仲未派比親友…

突然間 大家既心情好似輕鬆咗

​

所以經歷過揀相嘅過程

小編更加理解客人嘅難處

有時客人真係拎啲比較矇嘅相過嚟

小編都會解釋 如果你喺電話睇都已經矇

到時曬到12吋或者16吋以上就更加矇架

總之客人唔介意就可以了

​

咁如果先人真係冇相又可以點做呢？

我哋都可以用身份證去做既～

但係因為身份證係剩係得個頭

所以身體嘅部份我地會P返一個上身

咁就可以做到一張黑相架喇～