2024年11月15日

小編睇咗破。地獄（下）

而呢套戲小編覺得好嘅地方

係演員

尤其是韋羅莎 雖然戲份唔多

但係佢嗰段真係好正

為咗思念將兒子防腐後放去義莊

其實都真係有人咁做㗎 小編都做過

有家人將爸爸放在義莊20幾年

等媽媽過咗身之後都同爸爸一齊放喺義莊

所以如果小編遇着好似韋羅沙咁嘅一個客

小編就唔會覺得佢癲婆既

小編亦都好讚賞衛詩雅同朱柏康

尤其是衛詩雅

為咗短短幾分鐘破地獄嘅鏡頭

真係去苦練破地獄嘅動作

戲中亦特別有幾個演員都好值得尊重

就係扮遺體嗰幾位演員

好難得，好專業

劇情方面

小編覺得導演寫許冠文呢個家庭都寫得好好

大哥，唔想做喃嘸 就要逼住做喃嘸

細妹，好想做喃嘸 但係又唔做得

大哥就一路覺得個阿爸由細到大都係錫阿妹

阿妹又覺得由細到大阿爸都係錫阿哥

阿爸從來都唔會同啲仔女講佢自己嘅感受

呢個都係一個傳統華人家庭成日會發生嘅事

要到最尾 阿爸寫嗰封信先解開咁多年大家嘅心結

呢個point係小編覺得成套戲最感動到小編嘅一個位

當然呢一套係咪一套好電影

係在乎觀眾自己嘅感受

如果你睇完呢套戲你有好大嘅感觸

令到你有好大嘅啟發

咁呢一套就係一套好電影

好似小編睇「毒舌大狀」

就係因為小編唔係律師

所以都睇得好投入

如果係比律師朋友睇「毒舌大狀」

可能佢哋都會有唔同嘅睇法

所以作為一個殯儀嘅內行人

睇呢套破。地獄

感受就真係爭少少喇

都係嗰句

不喜勿插

2024年11月14日

尋晚小編睇咗 破。地獄了（上）

（有劇透，呢一個post係批評嘅，不喜勿插）

雖然在網上已經有好多對於呢部電影嘅評論

但係作為內行人，又咁難得有部關於殯儀嘅電影

小編點都要分一杯羹寫下評論嘅～

網上有好多對呢部電影嘅評論

絕大部份嘅評論都話呢套戲好好睇

所以小編入場前都預咗佢會好好睇

不過無奈…因為小編真係內行人

的而且確冇辦法好投入喺呢部電影

反而對於佢哋嘅內容 有好多個point都係

其實由頭幾分鐘秦沛嘅其中一句對白

殯儀呢行好易做，有手有腳就得（真正嗰句嘢唔記得咗佢講乜嘢，大約係咁嘅意思）

初初聽完呢句對白，我以為黃子華真係做個普通嘅行街

再過多幾分鐘，原來先發覺佢係要承繼半間板舖

我就覺得導演帶出呢個concept有啲離譜

作為一個殯儀嘅老行尊，要承繼自己經營半生嘅板舖，竟然句對白係你有手有腳就做得㗎喇…小編完全唔會認同（小編都知可能係劇情嘅需要）

正如小編成日都話，小編教徒弟嘅要求係好高，又點可能求其搵個人就得呢

第二個point，有好多行家喺Facebook都講過

就係製造一個殯儀行業好易搵錢嘅幻覺

做咗殯儀就可以一個月cover到六位數嘅開支

做咗一次執骨就可以有一疊錢做報酬

如果係咁，小編就發咗達啦…

而家亦在網上好多報道話做喃嘸師傅一個月都可以搵唔知幾多萬人工… 小編都夠膽講呢啲都係不盡不實嘅報道…

另外，其實都想講一個殯儀嘅行街都唔係萬能嘅

其實行街係唔使執骨，唔使同先人著衫化妝，唔使幫手化大型嘅紙紮，防腐更加唔輪到我哋做… 當然我知道呢啲又係劇情嘅需要… 不過都想澄清一下

呢套戲仲有好多同現實不同嘅地方

大家可以睇吓其中有個行家嘅Facebook

#肥仔殯儀手記

呢位行家都寫左好多point出嚟都好詳盡

更多批評就唔詳談了

可以睇返唔同殯儀行家嘅專頁

（續）

2024年11月11日

《殮房位置 下集》

而殮房地點，又令小編諗起第二樣嘢，就係教徒弟嘅事～以往小編教過幾個徒弟，當可以安排佢哋到醫院領體實習嘅時候，就算當日可以跟靈車到醫院，小編都會特登叫徒弟自己去殮房位置等。係！係特登叫佢哋自己去殮房嘅～

其實呢一個係一個test～

第一，要測試吓佢哋會係早到，準時，定係會遲到？

第二，其實我都要比佢哋知道每間醫院殮房嘅位置喺邊，佢自己親身行一次，第時個客問點去，佢哋就會識答。

雖然大家可能覺得去醫院個殮房咋喎，可以做到咩test？係可以㗎 從佢哋點樣樣搵到個殮房，幾點到達（這一點很重要），就可以睇到佢哋平時處事同解決問題嘅能力～

因為好多人覺得「準時」到就已經足夠….

小編通常教嘅徒弟年紀都唔會太過年輕

但係亦都發生過遲到啦，又話搵唔到啦，亦有徒弟話佢係前幾日已經去過一次醫院已經搵好條路線圖，確保自己當日一定安全到達。

呢個都係關於殮房位置嘅一啲軼事～