2024年6月23日

食環署撒灰而家轉左用呢款一次性嘅撒灰器，既乾淨又環保 唔使好似以前咁，個個撒灰都係用同一個器皿，呢個撒灰器完咗儀式之後就可以化咗佢～

2024年6月·20日

小編今朝返左去以前做金融時候既一個團隊做殯儀講座～ 一開始介紹既時候舊同事問小編做左殯儀幾多年，小編就話10年～ 大家忽然覺得時間過得好快～ 其實小編加入呢個團隊係15年前當年只有廿幾歲

#而家已經係師奶一名

2024年5月10日

<資助個案>

上個月小編接到一個WhatsApp詢問有關院出服務

傾傾吓， 客人誤會咗以為我哋最基本嘅收費16200係殯儀館服務。佢問如果佢哋需要再簡單嘅服務係咪唔需要萬幾蚊？ 咁當然小編就同佢解釋啦，其實16200已經係最基本院出服務嘅收費…

跟住客人就講，佢今年得25歲，而家係佢媽咪過咗身。爸爸喺佢好細個嘅時候已經同媽咪離婚。但係因為佢幾歲之後媽咪又將佢比老人家照顧，所以其實同媽咪亦都唔係有好多感情。而家突然媽咪過咗身，佢又冇兄弟姊妹，得佢一個好徬徨，一萬六千幾蚊對佢嚟講其實亦都係一個好大嘅負擔。跟住佢就話再諗吓辦法。雖然小編只係隔住個WhatsApp同呢位客人傾咗一陣，已經feel到呢位25歲嘅女仔，佢真係好徬徨… 冇人教到佢點做，佢亦都唔係唔想俾錢，但係真係經濟上好大壓力。

經過詳細了解呢位客人嘅背景，小編就決定免費幫呢個家庭做殯儀服務。

出殯當日，客人早咗個幾鐘頭到咗醫院… 因為佢想準備好啲～ 小編到咗之後會合客人，客人跟住小編去靈車度處理陪葬衣物，全程客人都係跟住小編（就連行幾步都跟住）。小編同客人講「唔使跟住㗎，你喺門口位置等我就OK 㗎喇」 但係客人話唔知點解好想跟住小編。

小編感覺到就算到出殯當日，客人都係好徬徨。佢只係25歲，可能係佢第一次面對死亡，應該咁講，小編覺得佢係唔知點樣面對死亡。

直到完成火葬場儀式上旅遊巴回程，就算同行有客人的丈夫及幾位親友，佢都係自己坐埋一邊，一句說話都冇講過…

小編都做過好多，客人係相對後生嘅個案。但係反應好似呢位客人咁嘅，應該係第一次…

過幾日小編又會再見到呢位客人，處理撒灰嘅申請… 到時候會再留意一下客人嘅情緒，再加以相關嘅協助