2024年最後一日 長氣小編同大家傾吓偈
小編喺2023年12月31日既post
講過2024年都係打大佬一年 大家要加油
初初都心存僥倖
希望2024年會好啲
果然真係打大佬
如果有睇晒晴善舍嘅post 嘅各位
都應該唔止一次聽到小編話今年好靜
其實唔止靜… 係好L靜
今年年尾出咗套關於殯儀嘅電影
突然間大家都關注咗殯儀呢個行業
又有一班好有熱誠嘅人想話入嚟殯儀呢個行業
又有一班人話做殯儀好好搵架
做喃嘸師傅一個月開20日工都搵八、九萬
其實啲錢邊有咁容易搵丫
喺今年個個都以為做殯儀係好賺錢嘅年頭
2024年正正係殯儀業嘅寒冬（應該冇人講過呢)
其實今年年頭已經feel到
跟住到咗年中 就有好多行家都講話係好靜
到第四季 甚至乎係土工師傅啦 旅遊巴老闆啦
壽儀舖頭 都話今年真係好靜
小編落到紅磡聽得最多嘅兩句說話
就係「好靜」 同埋「好耐冇見過你喇喎」
就連小編有朋友的媽媽是在教堂做善別小組（負責處理喪禮的義工）
都話佢哋教堂都少咗喪禮做…
不過小編成日都同家人及朋友講
上天對小編同晴善舍都算係好好
今年個案數量雖然減少少咗好多
但係都有啲個案嘅盈餘係比較好
整體嚟講雖然係差
但係都維持到一般嘅營運
對於出邊有好多行業 真係捱唔住要結業
我哋都算係平安地走過咗2024年
2024年有好多大家認識嘅人過身
有啲係病逝 有啲係自己選擇離開
唔知係咪2024腳頭唔好
身邊亦有好多人患病
2024年實在有太多唔係咁開心嘅事情發生
經濟…來年可能會更差…
不過大家要撐住…
有咩事唔開心
好老土嗰句 真係試吓搵人傾吓偈
雖然有好多嘢搵人傾咗都未必解決到
但係搵人傾吓 發洩吓情緒都好丫
真心希望2025年 大家身心都健健康康
事業家庭愛情學業 都順順利利 平安
下次再長氣同大家傾吓偈
為大家送上月頭小編去旅行在沖繩買的一個御守
小編唔識日文 淨係識睇「開運」兩個字
後邊用Google Translate
「願一條光明的道路為你敞開
希望幸福降臨在你身上」
Comments